<< KONA
Xelqara qelemkeshler merkizining 9-nöwetlik türmidiki yazghuchilarning heq-hoquqini qoghdash yighini bashlandi
RFA Ixtiyariy muxbirimiz ekrem | 2011-03-25
3-Ayning 24-Küni xelqara qelemkeshler merkizining 9-Nöwetlik türmidiki qelemkeshlerning heq-Hoquqini qoghdash yighini bélgiye paytexti bryussél shehiride bashlandi.
Échilish murasimi bryussél sheherlik hökümetning yighin zalida kech saet 18:30 bilen élip bérildi. Échilish murasimida bryussél shehirining sheher bashliqi nutuq sözlep, herqaysi ellerdin kelgen qelemkeshlerni bu qétimqi yighin munasiwiti bilen qutluqlidi. Murasimgha xelqara qelemkeshler merkizige qarashliq, besh qitedin kelgen 145 qelemkeshler teshkilatining köpligen ezaliri qatnashti. Uyghurlargha wakaliten xelqara qelemkeshler uyghur merkizining reisi qeyser özhun bashliq töt neper kishi ishtirak qildi.
Échilish murasimi axirlashqandin kéyin, kech saet 20:00 bilen sheher bashliqi qelemkeshler sheripige ziyapet berdi. Ziyapet zaligha toplanghan yüzligen qelemkeshler we qelemkeshler bilen ish birliki qurghan kishilik hoquq teshkilatliri tamaqtin kéyin bélgiyining yerlik senet nomurlirini kördi we dunyadiki mustebit hakimiyetler teripidin cheklengen naxshilarni anglidi.
2011-Yili 24-Mart beryusselda ötküzülgen xelqara qelemkeshler jemiyitining «9-Nöwetlik türmidiki qelemkeshlerning heq-Hoquqini qoghdash» yighini.
Bu qétimqi xelqara qelemkeshler merkizi türmidiki yazghuchilarning heq-Hoquqini qoghdash yighinining sahibxaniliqini bélgiye yazghuchilar birleshmisi, bélgiye qelemkeshler merkizi shundaqla ikorn, halma, passaport qatarliq teshkilatlar üstige alghan bolup, kechlik murasimda dunyaning herqaysi jayliridiki mustebit hakimiyetler teripidin türmilerge tashlanghan we herxil shekilde ziyankeshlikke uchrighan qelemkeshler eslep ötüldi. Jümlidin xitay türmisidiki lyu shawbo we uyghur yazghuchisi nurmuhemmet yasin qatarliqlar alahide tilgha élinip, nurmuhemmet yasinning « yawa kepter» namliq esiridin üzündiler oqup ötüldi.
3-Ayning 25-Küni saet 9:30 da, bélgiye sheher merkizidiki medeniyet ministirliqi tewelikidiki bir zalda 9-Nöwetlik türmidiki qelemkeshlerning heq-Hoquqini qoghdash yighini resmiy bashlandi. Yighinda qelemkeshler merkizining, herqaysi teshkilatlarning mesulliri we herqaysi ellerdin kelgen meshhur yazghuchilar, kishilik hoquq teshkilatining wekilliri hem yawropa parlaménti wekilliri nutuq sözlep, xitay qatarliq mustebit döletlerde türmide yétiwatqan qelemkeshlerge erkinlik tilidi. Mustebit hakimiyetlerge bolghan nepretlirini bildürdi.
Bashlinish saetliridila hemmining neziri xitay we xitaydiki qelemkeshler mesilisige merkezleshti. Yighin küntertipige binaen sözge chiqqan herqaysi ellerdin kelgen yazghuchilar birdek halda xitayning mustebitliki üstide we türmidiki heqsizliqqa uchrighan yazghuchilar toghriliq sözlidi.
Xitay qelemkeshler merkizining mesuli lyaw xanimning xitaydiki insan heqliri depsendichiliki toghrisida bergen doklati yighin ehlining küchlük diqqitini tartti.
Saet 11:30 da xelqara qelemkeshler merkizining mexsus yighini bashlandi. Yighinda herqaysi döletlerdiki qelemkeshler merkezlirining xizmetliridin doklatlar bérip ötüldi.
Yighinda herqaysi ellerning siyasiy weziyetliri, qelem ehlilirige chüshüwatqan bésimlar, qolgha élinghan, yézish heqliri cheklengen yazarlar mesililirimu otturigha qoyuldi. Yighin ehli weziyetler toghrisida melumatlar bergen yazghuchilardin munasiwetlik soallarni sorap, mezkur döletlerning ehwallirini ichkirilep chüshinish pursetlirige érishti.
Yighinda yene, xelqara qelemkeshler merkizining 2010-Yili osloda ötküzülgen yighinidin buyanqi paaliyetliri tonushturup ötüldi.
2009-2010-Yilliri dunyaning herqaysi jaylirida ziyankeshlikke uchrighan, qolgha élinghan qelemkeshlerning ehwalliri chong ékranda körsitildi.
Xelqara qelemkeshler merkizi terkibidiki qelemkeshler teshkilatlirining paaliyetliri, bolupmu türmidiki we ziyankeshlikke uchrighan qelemkeshlerni qutuldurush yolida körsetken tirishchanliqliri tilgha élindi.
Chüshtin kéyinlik yighin saet 14:30 da bashlandi. Nahayiti qiziqarliq bolghini, saet 14:40 ta yawropa parlaménti kishilik hoquq komitétining reisi heidi hautala xanim bilen xelqara qelemkeshler merkizining prézidénti john ralston saul ependi otturisida élip bérilghan munazire boldi. Ular sehnige chiqip, dunya qelemkeshliri we xelqaradiki kishilik hoquq depsendichiliki mesilisi toghriliq yérim saet munazire élip bardi. John ependining soallirigha heidi xanim yawropa parlaménti kishilik hoquq komitéti namidin jawab berdi. Heidi xanim xelqara qelemkeshler merkizining dunya tinchliqi, kishilik hoquq we erkinlik yolida körsitiwatqan tirishchanliqigha yuqiri baha berdi.
Uningdin kéyin, herqaysi ellerdin kelgen qelemkeshler öz dölitidiki kishilik erkinlik weziyiti toghrisida we özlirining qelemkeshler birlikining ehwali toghriliq doklatlar berdi.
Ottura sherq, afriqa elliride boluwatqan yasimen inqilabi toghrisidimu muhakime-Mulahiziler ötküzüldi.
Copyright © 1998-2011 Radio Free Asia. All rights reserved.
- Xewer menbesi:
- Xewrni anglash
