<< KONA
'5 - Iyul' din kéyin qelemkeshler nuqtiliq hujum nishani bopqaldi
RFA Muxbirimiz shohret hoshur 2009-10-28
Xitay 5 - Iyul weqesidin kéyin uyghur jemiyitining bir qanche qatlimigha nuqtiliq zerbe bermekte. Buning biri 5 - Iyul namayishigha biwaste qatnashqan we sepning aldida mangghan aktip yashlar؛ yene biri uyghur jemiyitidiki türlük mesililerni dadilliq bilen otturigha qoyup jamaet pikirige tesir körsitiwatqan ziyaliylar؛ bolupmu tor we metbuat wastisi arqiliq jemiyetke tesir körsitiwatqan qelemkeshler.
Uyghur rayonining reisi nur bekri 5 - Iyul weqesi heqqidiki doklatida, uyghurbiz tori we diyarim torini qutratquluq qildi dep eyibligen we bu ikki tor béktining sahibini tutqun qilghan idi. Nöwette uyghur tilidiki tor betlerning mutleq köp qismi taqiwétilgen.
Xelqara qelemkeshler jemiyiti uyghur merkizining bashliqi qeyser abdurusulning bildürüshiche, uyghur rayonidiki chong - Kichk uyghurche tor betlerning sani ikki yüzdin artuq. Nöwette bularning mutleq köp qismi taqiwétilgen. Tor betlerning taqilish nisbitige asasen tor bashqurghuchilirining tutqun qilinish nisbitini texmin qilish mumkin. Bu texminge asaslanghanda, nöwette qelemkesh tutqunlarning sani az dégende yüzdin artuq.
Nöwette uyghur tor we téléfon alaqisining késilishi, qelemkeshlerning tutqun qilinishi bir qisim xitay ziyaliyliriningmu mulahize timisi. Xitaydiki xeynen uniwérsitétining proféssori, uchurshunas bi yendaw bu mesilige izchil diqqitini bérip kéliwatqan bir tetqiqatchidur. Uning qarishiche, xitay hökümitining uchur - Alaqini muhim dep bilishi toghra, chünki bir hakimiyet, iqtisad, armiye we axbarattin ibaret üch xil küchke tayinip mewjudiyitini dawam qilidu.
Emma xitay hökümitining axbaratni bashqurushi, jümlidin uchur alaqini késiwitishi toghra emes. Bi yendaw boshün toridiki bu heqtiki maqaliside, uchur alaqini késish we qelemkeshlerni jazalashning, uyghur rayonidiki weziyetni ongshash üchün peqetla waqitliq bir chare ikenlikini, menggülük chare bolalmaydighanliqini eskertken.
Yuqiridiki awaz ulinishidin, bu heqtiki melumatimizning tepsilatini anglaysiler.
Bu xewrni anglash uchun bu yerni besing >>
Xewer menbesi:
